梅艷芳骨灰被盜丨梅啟明崩潰跪地喊冤：我偷骨灰做乜？臨時將梅媽追思會改為悼念梅姐

影視圈

更新時間：20:30 2026-10-11 HKT
發佈時間：20:30 2026-10-11 HKT

已故天后梅艷芳胞兄梅啟明，在其母親覃美金（梅媽）離世並火化後，一直無從得知梅媽骨灰的下落，早前更曾與泰籍未婚妻May May，到梅媽的銅鑼灣故居進行路祭。昨日（10日）是梅艷芳63歲生忌，梅啟明計劃到廣州為梅媽舉行追思會，未料到竟爆出梅姐骨灰被盜一事，梅啟明稱：「咁突然，兩件事一齊嚟，所以我諗住又做阿媽（追思會）、又做阿妹。」他臨時起意將梅媽追思會改為「永遠懷念梅艷芳」追思會，現場以99枝花布置，背景則是梅姐在花海中微笑的相片，有途人及工作人員共34人出席。

梅啟明台上激動崩潰痛哭喊冤

梅啟明在台上透露改變主題的原因，因早上收到梅姐骨灰被盜的消息，嘆7月發生至今全不知情，「如果搵返阿妹骨灰我就放心，因為阿梅在香港做好多善事，邊度有水災、有咩事都第一時間做善事，出錢出力，點解佢骨灰會被盜去呢？真係好殘忍！希望香港市民、阿梅粉絲，有阿妹消息都盡快與警方聯絡，希望盡快搵返阿妹骨灰！」提到阿梅，梅啟明忍不住數度崩潰痛哭，未婚妻May May也上台送上紙巾並安撫他，梅啟明續說：「阿妹你快啲顯靈，帶返骨灰返來，阿媽骨灰都未有下落呀！好冇呀？」至於有人質疑梅啟明偷骨灰？他邊哽咽邊說：「我偷骨灰做乜呀？啲人有冇良心，講啲咁嘅說話，我偷來做乜，嗰個我個妹嚟！」

梅啟明崩潰跪地求尋回梅媽與梅姐骨灰

問梅姐骨灰被偷是否涉及敲詐？梅啟明哽咽表示：「點解會咁樣做，阿媽骨灰未搵到，佢（梅姐）骨灰又被偷埋，唔知佢動機為何，係咪綁票勒索？唔知，無人聯絡過我，包括警察都無聯絡我。」梅啟明表示，曾計劃將梅媽和妹妹的骨灰放在一起，「我原本想和大嶼山方面傾，睇有冇位畀阿媽，到現在都未答覆，我原先想放一齊，等佢母女咩啲啦，你天有眼呀！我求下你，盡快搵返阿妹骨灰返來，同埋知道阿媽骨灰係邊度，希望盡快處理呢兩樣嘢，咁我心安理得，否則一世都唔安樂！天公，我求你畀阿妹骨灰快啲返嚟，同埋你依家係神仙、知道阿媽骨灰係邊度，你知道快啲幫手，帶埋阿媽骨灰，好冇呀阿妹？我求下你呀！」追思會尾聲，梅啟明最後崩潰跪地，背景播放梅姐的唱歌片段。