愛回家之三代同糖丨首播變「愛嘈交」？被批老土悶到喊觀眾拒收貨：幾時大結局

更新時間：14:00 2026-08-11 HKT
發佈時間：14:00 2026-08-11 HKT

TVB全新處境劇《愛‧回家之三代同糖》於昨晚（10日）首播，劇情講述控制欲極強的公關女王唐萬里（吳若希飾）獨力照顧女兒唐芯（李茵彤 Desta 飾），與吳若希鬧矛盾多年的唐母唐曹嘉冰（車婉婉飾）忽然由加拿大返港，並借故搬入萬里家，展開家嘈屋閉的三代同堂生活，故事發展仍有待追看，但首集播出後，秒速被網民瘋狂洗版，負評聲音佔了大多數。

吳若希首當其衝成為網民箭靶

不少習慣了「熊家」與「接龍」的觀眾直言難以適應，甚至有人留言高呼：「睇咗幾分鐘就想熄電視！」首當其衝成為網民箭靶的，是擔正做女主角的吳若希（Jinny），大批網民狠批吳若希演技生硬兼表情浮誇，指她在鏡頭前聲線太嘈吵，令人難以投入，甚至更有人將她與「大小姐」林淑敏作比較，直指她「想扮霸氣但失敗，反而充滿師奶味」，除了演員表現，劇集的製作與節奏亦備受質疑。

《三代同糖》首播劇情與選角同遭狠批

《三代同糖》一開播即發生兩大事故，先後是李茵彤「校園非禮暴力事件」和車婉婉「飛機讓座事件」，兩單都要吳若希介入解決，播出後已經很快被洗版式討論，有人說：「第一集嘅《愛回家》真係好唔掂，雖然言之過早，但係睇見吳若希再加車婉婉兩個唧都唔笑，同埋公關公司背景就好似睇緊90年代嘅sitcom...，點解上一套咁成功？因為就係夠輕鬆返到屋企唔使諗咁多，笑住嚟送飯。」、「新劇真係入唔到屋，要入屋嘅劇集一定要夠貼題夠爆，令人留下深刻印象，咁樣先叫做入屋。」、「新劇做到就係唔好睇。」、「睇咗5分鐘瞓着咗，最尾五分鐘又醒咗！見到個（嗰）兩母女同框感覺好核突，兩姊妹尚可接受。仲有飛機個part 勁無聊，完全唔知想點！」、「覺得車婉婉適合演吳若希角色、江美儀演車婉婉角色多啲。」、「睇完重播我唔知自己睇咗咩。」、「陪屋企人睇咗一集《三代同糖》，阿媽話悶到喊，睇新聞台算。」、「感覺Jinny 啲戲可以improve下。」、「幾時大結局？」、「吳小姐把聲好嘈，3分鐘已經頂唔順轉台。」、「角色上搵錯人，年紀唔make sense，吳若希個女Desta真實年紀只差8年，搞到佢個女喺戲入面扮細過，真係三代同糖。」

李茵彤被指「路人樣」網民反讚演出自然

在劇中飾演「唐芯」的李茵彤Desta，雖然有人覺得她路人樣點做女主角，不過有人覺得順眼過吳若希：「新人嚟講演出都算自然。」、「第一集Desta最有驚喜，估唔到第一次做戲都幾好，其他人好作狀浮誇。」、「佢做得好自然，幾得意，又幾適合個角色。」、「佢好睇過吳若希，仲有間公司啲同事，講嘢都唔正。」、「Desta幾cute幾可愛，笑容幾甜，但唔適合做處境劇後生女最受捧嗰個，做類似路小小羅毓儀呢種定位更加適合。」、「3個女人中，覺得佢很好，最好了，唔係靚，但順眼舒服唔好好似吳女士咁戰鬥格，我已放工回家。」、「演得自然，真係似18歲細路女。」、「佢素顏其實幾可愛。」、「超級可愛嘅女仔，好鍾意睇佢。」、「幾得意，幾適合個角色。」