洪永城受梁諾妍身材壓力爆焦慮 揭黃翠如用AI執相拒做運動 直認為高海寧做媒約唔到
更新時間：21:20 2026-08-11 HKT
發佈時間：21:20 2026-08-11 HKT
發佈時間：21:20 2026-08-11 HKT
字體大小
洪永城、孫慧雪、蘇皓兒（Chloe）及黃俊豪今日出席纖體美容品牌活動，到酒店天台泳池參加池畔派對，四位對於身材管理均有心得，表示在飲食與運動以外，作為藝人為要出鏡拍攝不時要透過高科技器材極速修身。
男人減肥都係終身事業
洪永城代表身在外地的太太梁諾妍（Inez）出席活動，訪問時笑言老婆勤於跑步運動，令自己有身材焦慮：「我要消脂，老婆冇要求、自己要求，望住佢好羞恥！以為女人減肥係終身事業，原來男士都係一樣。」日前洪永城負責湊女放電，發覺照顧孩子非常辛苦：「完全遺傳媽媽基因鍾意跑步，問佢哋點解要跑？佢哋話『no reason！』其實攰都係值得，唔知陪到佢哋幾多個暑假，已經倒數緊。」就算辛苦亦盡力花時間照顧女兒們成長。
洪永城踢爆黃翠如需要運動修身
談到做運動，洪永城更踢爆老友黃翠如並非上鏡般瘦，需要做運動修身，但屢次勸她做運動都未能成功：「妳唔好以為自己好瘦先得㗎，叫佢做下運動，佢仲話AI執相可以搞掂，幾下掌上壓都做唔到！」表示黃翠如對運動沒有興趣，曾邀請她一同打網球與匹克球都未有應約。
洪永城承認介紹對象給高海寧
早前高海寧於節目上被爆洪永城充當媒人，有介紹對象認識，洪永城承認曾介紹幾位男性朋友，但高Ling始終時間忙碌未有應約、進一步認識：「又唔係彈鐘！識朋友都要夾，佢哋都未見過面。我會檢討下自己個倉庫。高Ling我會keep住介紹畀妳！」認為要合眼緣並不容易，亦不覺得高海寧眼角太高。
