《你的保安李寶安》收視暴跌導演何爵天鞠躬道歉認似學生作品回應負評承諾刪爛Gag

更新時間：15:30 2026-10-31 HKT
發佈時間：15:30 2026-10-31 HKT

由金像獎新晉導演何爵天執導，李尚正、盧頌恩（妹姐）、麥沛東、曾睿智及王耀宏主演的HOY全新處境喜劇《你的保安李寶安》，周一（26日）首播開出紅盤後引發全城熱話，逼得同時段對撼的 TVB 處境劇《愛·回家之三代同糖》緊急變陣迎戰，重召昔日經典班底「三太」樊亦敏及「KC」歐瑞偉以全新角色強勢回歸搶客；然而《你的保安李寶安》隨後似乎無以為繼，周四（29日）收視已回落至 4.9 點（約 30 萬觀眾），對比首播的收視一度衝至9.4點，最新一集的可謂「暴跌」。至昨晚（30日）官方更抽起第 5 集，改播全新常設答問大會正面回應網民對故事節奏欠佳、密集食字 Gag 尷尬、保安室燈光灰暗偏冷及剪接怪異等種種負評，導演何爵天更在節目中當場向全港觀眾鞠躬致歉，坦言虛心受教：「啲人話似學生作品，的確係一個學生作品，因為我都係拍 sitcom 嘅學生，我都學習緊。」

何爵天順應民意刪改爛Gag

導演何爵天透露，一般劇集兩天可能只拍十幾分鐘的播放長度，但他們目前卻要一天「乾炒」出 20 分鐘的成品。為了節省成本，劇中的「保安室」其實是由有線電視大樓 7 樓的人力資源部（HR）辦公室改裝而成，他坦言：「真係學生作品嘅 budget 都不如，所以預算的確比較緊張。」對於被批評劇中充斥大量無厘頭、食字金句及網絡迷因（Meme）等爛 Gag，雖然監製翁子光形容這是「風格」的一種，不應完全放棄，但何爵天表示：「可能監製唔同意，叫我唔好矯枉過正，但係我收到太多意見，所以打畀剪接師叫佢剪咗啲食字 gag 同埋嗰啲數白欖，可以嘅不如拍過囉，既然觀眾唔鍾意，就順應一下民意。我自己有諗過可能真係太多，可能演繹或者文本唔係咁好，不如重新再寫過，變返做一個正常對答。」何爵天更笑言看到有網民留言提議幫手「供橋」，他說：「我覺得幾好，我今日見到一個幾鍾意嘅，講邱副隊長同清潔姐姐有愛情戲，或者清潔姐姐同 Meaning 有愛情戲份，我而家腦洞大開，可以諗下。」

翁子光何爵天認成本緊絀

提到觀眾批評廠景燈光灰暗偏冷、單機拍攝、剪接奇怪以及缺乏外景等問題，何爵天直言受成本所限：「真係單機拍。（高層唔係話全力支持？）嚟緊嘛，希望嚟緊越嚟越多 budget。有啲網民話 sitcom 應該係光啲嘅，咁我望返香港一啲 sitcom，又真係光猛啲，光啲開心啲。希望多啲 budget 咪可以多啲場景，有返啲外景。」監製翁子光則補充，保安室是由實景改建而成，無法像傳統錄影廠開頂或拆移假牆由外打燈：「『世界光』好嘢嚟㗎，我唔係寸其他電視台，韓劇好鍾意世界光，但導演又想光線有多啲變化，打燈有多啲設計，想啲嘢立體啲，呢個都係適應期，又或者我哋調返光啲。」至於全劇集中於單一室內景拍攝，翁子光解釋：「我哋拍 sitcom 真係好趕，走景成本好大。我哋會努力爭取一啲新嘅景，可能會成為我哋衍生出嚟嘅新景，譬如今日傾開打拳擂台，或者泳池，大家可以游水，總之係一啲開心嘅景。」