玫瑰戰爭丨陳展鵬自嘲生仔有啲自卑 被長輩搭膊頭叫「加油」幾年 傅嘉莉恨做媽媽加快人生計劃
發佈時間：08:00 2026-11-10 HKT
陳展鵬與傅嘉莉及陳楨怡在台慶劇《玫瑰戰爭》中均有感情關係，陳展鵬笑指兩女可能是喜歡他的錢，搵真愛好難，不過坦言今次傅嘉莉「升呢」，因兩人拍《張保仔》時對方是做妹仔，今次就做他的老婆，傅嘉莉即問他「咁你想唔想？」展鵬說：「冇話想唔想，角色空間就係咁闊，真實梗係唔好啦，好煩，一個夠！」
陳展鵬想突破純情形象
他又表示要多謝佳導(鍾澍佳)，因為很想突破多年讓觀眾有刺激感：「多年嚟都係留意我嘅家庭，大家都想睇下我有三角戀或婚外情又會點呢？唔好咁純啦，（會唔會變渣男？睇到想打你？）咁又唔會，我有錢呀嘛，有錢就唔係渣男，有少少分別嘅。」
陳楨怡拍床照戲
問到兩女是否有在戲中色誘展鵬？陳楨怡就大賣關子表示未去到色誘：「但有床上嘢，有少少相。（床照？）差唔多，好近！」展鵬亦大讚陳楨怡今次角色立體很多，有突破，自己跟兩女也夾了很多。
傅嘉莉角色講生仔貼近自己年齡
而傅嘉莉這次的角色情感上多起伏，也很難演，傅嘉莉就感激鍾澍佳讓她重遇展鵬：「佢真係睇住我成長，所以對住佢都有少少壓力，希望演技真係可以拍得上視帝。」又指自己雖然在劇中沒有床上戲及靚跑車坐，不過就多了人生要面對的事情，如生仔：「會有啲被迫打針生小朋友嘅戲，同埋原來生唔到小朋友喺屋企係會企唔穩。」因角色貼近自己年齡也令41歲傅嘉莉思考自己，究竟應該天然或是靠其他方法懷孕？或者不育是否影響婚姻？
傅嘉莉認感情生活開心
她坦言想生仔，發現這是自己想要努力去做的事情，又指會加快自己的人生計劃：「好努力中，（有冇人陪你努力？）er…係囉！我都希望會慢慢公布，（有男朋友？感情生活開心？）都開心嘅！」記者提議她可以找展鵬取經，展鵬即表示沒問題，他有經驗可隨時找他，自己跟公司很多男演員都有很多經驗，但認為最重要的是自己能遷就時間及舒服，因結婚始終是兩人的事！」
陳展鵬談生仔壓力
展鵬又自爆近年被很多人搭膊頭叫加油：「好似我唔得咁，但開心嘅，但最緊要就自己時間，（生仔方面有壓力？）壓力就冇，但覺得有啲自卑，覺得自己唔係好掂咁，成日啲uncle auntie過嚟搭膊頭，搭咗幾年都係搭我，不過開心嘅，大家都想祝福，一個家庭越多成員越好，大家有多啲喜悅，喜事好緊要！所以我期待呢個安排。」
傅嘉莉怕與女仔打交弄傷對方
另外，傅嘉莉在劇中跟陳楨怡會有口角及推撞戲，更會跟陳自瑤打交和爭執，她指也會很驚跟女仔拍這些戲，很怕會弄傷對方。
